Schwäbisch im Alltag

Ein typischer Ehestreit

S: Mo, hosch Du scho widdr oins vo meine T-Shirtla zom Autoputza gnomma?
E: Wells T-Shirt? I han bloß des gelbe do gnomma, des isch doch scho ganz kabudd gwä!
S: Des war fei mei Lieblings-T-Shirt, Du Halbdaggl! Des war vo meinr Muddr!
E: Vo deira Muddr? No isch’s jo guad, dass es weg isch, des Deng hodd mr doch net seha kenna!
S: I guck jetzt di o, ond mir gfälld au net, was i sieh!
E: Gerda, jetz mach hald koi Fass uff, i kauf dr hald a neis, wenns sei muass!
S: Des hosch Du au gsagd wega meim Suppahäfele ond wege meinr Nachdischlamp und wega meim Audo!
E: Heilandzack, der Karra isch doch von alloi heeganga!
S: Du bisch so an waidagrdr Waidag, so an vrkommenr!
E: Wenn’d jetz beleidigd bisch, no schlof i heut Nachd bessr beim Hond em Körble!
S: Bloß dass’es woisch, dr Hond will di fei au net!

Ein typischer Ehestreit

S: Sag mal, Karle, hosch du eigendlich Wurzeln gschlaga uff am Sofa? Warsch du heut iberhaupd scho mol senkrecht?
E: I denk noch! Denka isch au Arbad, des unterschätzsch Du emmr dodal!
S: Denka? Dass i net lach! Du denksch höchstens driebr noch, wia de am Gschäft vorbeikommsch, du Heggabeerlesschlambr!
E: Jetz reg de net uff, d’ Welt goht net ondr, bloß weil i mol d’ Fiaß hochleg ond dr Herrgott an guata Mo sei
S: Mol? Seid de Neine schdraggsch scho do! D’ Nachbere hot scho Kehrwoch ferdig ond du hosch no net amol da Müll nausdo!
E: Dia Häberle isch hald au so so a uffgrede Krawallschachdl. Dia fegd ja scho Schnee, bevor’s ieberhaupd gschneit hot, des isch scho krankhafd.
S: Schwätz net domm drher, du Grasdaggl! Beweg dei Fiedle, sonsch bleibt d’ Kirch heut em Dorf ond d’ Spätzla em Topf!
E: Wia? Koine Spätzle? Des isch jo seelische Grausamkeit, des ghörd schiergar ozeigd!
S: Grausamkeit isch, wenn i dei Visasch da ganza Dag agugge muass, ohne dass de au bloß oin Finger krumm machsch!
E: Sapperlot, jetz wirsch abbr giftid. I gang ja scho, abbr bloß, damit a Ruah isch ond d’ Soß net neibrennd!
S: Also, mach ane! Ond nimm au glei da Gelba Sack mit, der sieht scho aus wie dei Bruadr am Samschdich – voll bis oba na!
E: Jetz wird’s abbr persenlich! I glaub, i brauch hendher a groß Viertele, sonscht überleb i den Dag net!

Ein typischer Schwatz am Gartenzaun

A: So, au am Schaffa!
B: Isch jo emmr was z'doa!
A: Duad oim jo au guad!
B: Blos em Greiz net!
A: Äbbas isch hald emmr!
B: Ja no!
A: Hosch rechd!
B: S'Wäddr soll halda!
A: Abbr Räga fehld scho!
B: Muaß mr hald schbrenza!
A: I han a Fässle!
B: Des brauchd mr au!
A: Ond, wo ane?
B: Ens Schdädtle...
A: Brauchsch was?
B: Noi, blos gugga!
A: Was isch'n do dieba?
B: Raigschmeddge vo Berlin!
A: A wa!
B: I sag dr's!
A: Kennad hald koi Kehrwoch!
B: So siehd's do aus!
A: Muasch halt mit ne schwätza!
B: Des mechd mei Frau!
A: Hoffad mr's beschd!
B: Was soll mr sonsch do!
A: S'isch hald ällas nemme des!
B: So, i muass los!
A: Adee ond gsond!
B: Gruaß drhoim!

Ein typischer Schwatz am Stammtisch

A: Hosch Du des Spiel geschdrn Obad gseh?
B: Ha jo, abbr des war ja bloß a Gegurke!
A: Die han gspielt, als wär’s ihr erschts Mol.
B: I han gmoind, i seh net recht!
A: Ond der Schiri erschd!
B: Gang mr bloß weg mit deam!
A: Mit soma Hefakick gwinnsch halt koi Spiel.
B: Hosch rechd, abbr s’isch halt so!
A: Nemmad mr no a Bier?

Ein typischer Schwatz auf der Strasse

Karl (leise):
Jetz leck me doch glei am Arsch,
do vrkommd mr am hellichda Tag onser Nochbr.
Ersch denksch an nix bees ond no au no des!
Karl (laut):
Griaß Di Eigen, ond sonsch?

Eugen:
Jo, scho rechd, hald emmr viel zom do!
Ond selber? Wo gosch na no no?

Karl:
I muass uff dr Wochamarkt
ond a Säggle Kardoffl besorga.
Abbr mei Greiz wird hald au nemme bessr
ond dia Salb vom Dogdr daugd nix.

Eugen:
No lass’ hald langsamr aganga,
’s bressierd jo nix meh in onserm Aldr.
Kosch jo nochher uff em Schässlo a bissle ausgruaba.

Karl:
Do hosch rechd, abbr mei Frau moind hald äwwl,
i sodd meh em Garda do ond au em Haus helfa.
Kaum benne hählenga nogschdraagd,
schreit se scho widdr noch mr.

Eugen:
I woiß, ohne ons gohd hald nix,
dia Jonge hängad blos faul ab ond machad sich
Sorga om ihr "Wörglaif-Bäläns" ond dalgad
äll Dag uff ihre Eibreddla rom.

Karl:
Gang mr weg midd deane,
des send doch ällas waidagede Lällabäbbl.
So Eigen, machs guad ond an Gruaß an d'Lina.

Eugen:
I richds aus, abbr jeddz muass e los,
sonsch griage Ärgr drhoim.

Karl:
Jo, mr siehd sich, ond gsond!

Karl & Eugen (leise zu sich selbst..):
So an segglbleedr Seggl abbr au!

Ein typischer Schwatz beim Bäcker

A: Grüß Gott, i hädd gern zwoi Weckla ond a Brezel.
B: Gern, sonsch no äbbas?
A: Henn Se au frische Seela?
B: Klar, heit morga frisch aus’m Ofa!
A: Guad, dann nemm i no oine drzua.
B: Des macht no vier Euro fuffzig.
A: Do, biddschee.
B: Dankschee ond no en scheena Dag!

Ein typischer Schwatz im Treppenhaus

A: Bisch scho wiedr am Kehrwoch macha?
B: Ja freile, wenn i’s net mach, macht’s ja koinr!
A: Du bisch au a rechdr Butznarr.
B: Ordnung muaß sei, sonsch goht älles dr Bach na!
A: Schaffsch no lang, oder bisch bald fertig?
B: I schaff, i schaff… abbr fertig werd i heut morga nemme!
A: Ha, typisch! Emmr groß schwätza ond no nix na bringa.
B: Halts Maul ond reich mr dr Schrubbr!

A: Geschdrn Obad hot der von oba widdr sei Gschirr an Wand pfefferd!
B: Ha no, des scheppert doch äll Däg!
A: I glaub, dr isch net ganz bacha.
B: ’S isch halt an rechdr Zornigl.
A: So, I muass jetz weidr, also schaff’s no guad!
B: (leise) Dommschwätzr!

Ein typischer Schwatz in der Küche

A: He, wo bisch’n du gwä? I han di scho gsuacht!
B: I? I war bloß kurz beim Bäckr, han mr ebbes zom Essa gholt.
A: Ja no, hosch mir des net vorher saga kenna?
B: Ha noi, i han hald denkt, i bin jo glei widdr do.
A: Jaja, des denked se älle, ond no hocksch widdr irgendwo rom ond schwätsch!
B: Ach was, i schwätz doch net viel!
A: Ha, des glaubsch au bloß du!

Ein typischer Schwatz unter Nachbarn

A: Sag amol, hosch du des gerschd gseha?
B: Was denn, i ben scho um achte im Neschd glega.
A: Ha des glaub i dr et, du bisch doch sonsch emmr lang wach!
B: Scho, abbr i war fix ond ferdig vom Heggaschneida.
A: Mensch, do isch doch am Karle sei Katz uff’m Dach khockt!
B: Was? Wie kommt denn die do nuff?
A: Koi Ahnung, die isch halt irgendwie nuffgschbronga.
B: Ond wia isch se no widder ra komma?
A: Dr Karle hodd se mit dr Loidr na hola miassa.
A: Bei ons im Flecka isch halt immer ebbes los.
B: Do hosch recht, langweilich wird’s net!

Ein typischer Streit am Stammtisch

A: Also i sag’s Dir, dr VfB isch oifach an Haufa Luscha! S’ledschd Schpiel häddad mr haushoch gwinna miassa!
B: Du schimpfsch doch jetz bloß, weil de beim Benoggl widdr ällas vrsemmeld hosch und a Ausred suachsch!
A: Lass me en Ruah! Du hosch grad a halbs Bier intus ond siesch hald scho widdr ällas dobbeld!
B: Ond wer hodd denn beim ledschda Grilla älle Würscht vrbrennd wi so an Feuerdeifl?
A: Des isch doch a uralde Gschicht, abbr Du warsch beim ledschda Kegla so bsoffa, dass de dei Kugl in deim Bierglas gesuchd hosch!
B: Des isch doch vrschdonga ond vrloga! Abbr wer hodd’n vorhin sein Dabb en dr Hosadasch abglegd?
A: Ond wer hodd beim ledschda Angla an alda Schuah rauszoga und gschria: I hann an Riesafisch an dr Angl?
B: Des war doch bloß an a Witz! Abbr wega wem seinr dolla Wandr-App senn mr neilich femf Schdond em Kringl gloffa?
A: Jetz isch no au guad! Wemmer so weidrschrdeidad, no sitzad mr morga no do, I muass hoim!
B: I au, s’gibd Saurkraud ond Vorwirf!
A: Also, broschd ond gsond!